طبعا غلط وغير منطقى اننا تفتكر ان تعليم الهندسة بدأه محمد على باشا..ماهو بالعقل سعادتك العمائر والاختراعات والدراسات اللى ظهرت قبله وكانت احسن منه مليون مرة ظهرت ازاى؟!
.
حتى فكرة المهندس خانة جت صدفة..عمرك كنت تتخيل ان انشاء كلية الهندسة بدأت بمحصول الارز.؟
طبعا علمونا ان محمد على باشا عمل المهندس خانة وتبنى فكرتها لكن ايه السبب ؟! تعالى احكيلك.
.
تعالى نضرب غطس ونروح لسنة ١٨١٦ م.
محمد على باشا تخلص من كل اللى مضايقه وبدأ يتفرغ للبناء والتعمير.”لحسابه فقط”.
الاسعار زى الزفت والناس فقراء والحال ضنك.ومحدش كان لاقى شغل غير عند محمد على.
اللى احتكر كل شئ وكل حاجه.
من ضمن الامور اللى احتكرها محمد على باشا الزراعة.وبالاخص القطن والحبوب.ومن المزروعات اللى تعتبر مهم محصول “الارز”.
هاتقولى طب وايه علاقة “المهندس خانة” بمحصول الارز ؟
بيقول الجبرتى عن الارز.
. “ومنها استمر التحجير على الارز ومزارعه على مثل هذا النسق بحيث ان الزراعين له التعبانين فيه لايمكنون من اخذ حبة منه فيؤخذ باجمعه لطرف الباشا بما قدره من الثمن ثم يخدم ويضرب ويبيض في المداوير والمدقات والمناشر بأجرة العمال على طرفه ثم يباع بالثمن المفروض”.
طبعا جمع المحاصيل الزراعية بالطريقة دى خلق سوق ورواج وغناء فاحش لمحمد على باشا وعصابته.
الكميات الرهيبة من المزروعات محتاجه فكرة لتشوينها وتحصيلها وشحنها وتجهيزها للسفر بلاد بره..😂😂😂
انت بتهرج ولا ايه ؟! هو انت فاكر انه بيجهز عشان المصريين تطفحه ؟!😢.
ظهر شاب عبقرى اسمه ” حسين جلبي عجوة “. الراجل ده هو السبب فى فكرة المهندس خانه اللى محمد على فتحها.
..الراجل ده عمل تصميم للالات اللى بتقوم بدري وتقشير الارز وصنع دولاب من الصاج صغير.
كنموذج مبدأى للفكرة.وراح يقابل محمد على باشا.
الراجل لما شاف الفكرة انبهر جدا جدا..
وراح باعت حسين عجوة على دمياط ينفذ المشروع وفعلا الراجل نجح جدا والمشروع كان طفرة جديدة لانه بأقل مجهود نجح فى ابتكار آلة يحرمها جوز ثيران بإنتاج كميات اضعاف ما كانوا بيعملوه خمسة ثيران.الثيران جمع ثور.
المهم الفكرة نجحت اوى اوى وتكررت تانى فى رشيد وبدأ تعميمها.
ووقف محمد على يضحك ويقول عفارم عفارم…
اسمع عمنا الجبرتى.
“منها ان الباشا لما رأى هذه النكتة من حسين شلبي هذه قال ان في اولاد مصر نجابة وقابلية للمعارف “.
.
امر محمد على بافتتاح مكتب صغير ملحق بالسرايا فى شبرا.
اسمع الجبرتى فى التالى وتكمل.
“فأمر ببناء مكتب بحوش السراية ويرتب فيه جملة من اولاد البلد ومماليك الباشا وجعل معلمهم حسن افندي المعروف بالدرويش الموصلي يقرر لهم قواعد الحساب والهندسة وعلم المقادير والقياسات والارتفاعات واستخراج المجهولات مع مشاركة شخص رومي يقال له روح الدين افندي بل واشخاص من الافرنج واحضر لهم الات هندسية متنوعه من اشغال الانكليز يأخذون بها الابعاد والارتفاعات.. والمساحة ورتب له شهريات وكساوي في السنة واستمروا على الاجتماع بهذا المكتب وسموه مهندس خانة في كل يوم من الصباح الى بعد الظهيرة ثم ينزلون الى بيوتهم.”..
.
الشباب اتعلموا وبقوا زى الفل حلو كده ؟!
لا يابرنس لسه معرفناش هو علمهم ليه؟
ده السؤال المهم..هو انت فاكره بيعمل حاجه لله ؟!
اسمع وانت تفهم.
“ويخرجون في بعض الايام الى الخلاء لتعليم مساحات الاراضي وقياساتها بالاقصاب وهو الغرض المقصود للباشا “”
الغرض توفير ناس بتقيس الاراضى وتعرفه المساحات كويس اوى..لان بعض القياسين كانوا بيتفقوا مع الكُشاف فى الدوائر وياخدوا رشوة ويبلغوه بمساحات اقل بالتالى يخسر. مع انه كسبان انما كان ماصص عافية البلد لآخر قطرة.
مكنش يجرؤ حد ياكل من خير ارضه الفلاحين بقوا مديونين وبدل ما كانوا اصحاب ارض بقوا مجرد مستأجرين او عمال تراحيل بالاجرة.
وللعلم ناس كتير اوى طفشت من مصر وسافرت فى انحاء المغرب وسوريا وفلسطين والعراق.
الراجل ده عمل مشاريع حكومية رهيبة لكن المنافع منها محمد على فقط.
حقق مجد ونجاح منقطع النظير فى عهده لكن لمحمد على فقط..
وبصراحه معاه حق ماهو كده كده اصحاب البلد مش هاياخدوا حاجه وكده كده منهوبين الحل يبقى ايه؟!
نسمع شهادة الشيخ عبد الرحمن الجبرتى.اللى بسببه عرفنا انجازات محمد على باشا “لنفسه فقط”.
كان هو المصدر الوحيد لمعرفة انجازات محمد على باشا. اسمع الفقرة وانت بتقراها كويس.
“وكان له مندوحة لم تكن لغيره من ملوك هذه الازمان فلو وفقه الله لشئ من العدالة على ما فيه من العزم والرياسة والشهامة والتدبير والمطاولة لكان اعجوبة زمانه وفريد اوانه ”
المحتل العثمانلى كان دائما يرسل نبضات يزرعها فى تبخس من قدر المصريين فى نفسهم..افقدهم الثقه فى نفسهم والحقيقة نجاحه يرجع لسببين.
الاول تجهيل الناس.
الثانى زرع الخوف جواهم.
وبصراحه نجح فى الموضوع ده جدا.المدارس قفلت والجامعات اختفت ومفضلش غير الازهر الشريف اللى اغلب رجاله كانوا فيهم عيوب كتير وابرزها الرِشوة. التلاسن بينهم. والمنافسه على نيل رضا الحاكم.
عقلية محمد على كحاكم ناجح اداريا لا تمحى عنه الظلم للعباد.
الناس فى الشوارع مثل حلقات السلسلة كل واحد مربوط بالاخر وكل سبب له سبب آخر متمم له ومكمل لوجوده..العباد فى اى بلد هم صناع الحاكم.
عشان كده عجبنى ذكاء محمد على جدا.
وهانلاقيه هو نفسه بيعطى سبب ظلمه فى عبارة اخرس بها النخبه المحترمه.
لما طالبوه بالكف عن الظلم قالهم بمنتهى البجاحة انا ابطل ظلم لما انتم تبطلوا ظلم الاول…خلص الكلام..#يلانروح_مصر
